Հունվարի 11-ին նշվում է Շնորհակալության միջազգային օրը: Այսօր ամենաքաղաքավարի օրերից մեկն է: Դեռ փոքրիկ երեխաներն էլ գիտեն, որ «շնորհակալությունը» կախարդական բառերի շարքից է և ամեն անգամ մեր շուրթերից հնչելով՝ մարդկանց ուրախություն է պարգևում, իսկ մեզ էլ ավելի բարի է դարձնում: Պատահական չէ, որ օտար երկրում հայտնվելիս մարդիկ առաջին հերթին փորձում են սովորել հենց այդ բառը տվյալ լեզվում: Ի դեպ, ոչ մի լեզվում «շնորհակալություն» բառը հենց այնպես չի առաջացել, այս բառերի արմատները գալիս են դարերի խորքից ու իրենց մեջ ամփոփում մարդկանց երախտագիտությունն ու փոխադարձ ջերմ վերաբերմունքը: Բոլորս էլ գիտակցում ենք գեղեցիկ ու շնորհակալական խոսքերի արժեքը: Ամենօրյա կյանքում շնորհակալական խոսքեր մենք օգտագործում ենք կարծես իմիջայլոց, չմտածելով դրանց էության մասին: Սակայն շնորհակալական խոսքերը կարծես կախարդական ուժ ունեն: Դրանք մարդկանց պարգևում են ուրախություն, ուշադրություն դարձնելու միջոց են և մարդկանց պարգևում են դրական լիցքեր: Առանց այս խոսքերի մեր կյանքը կլիներ տխուր և տաղտկալի: Հոգեբանները վստահ են, որ շնորհակալական խոսքերը նման են «բանավոր շոյանքի», որոնք ունակ են հանգստացնել և տաքացնել իրենց ջերմությամբ: Կարևորը որպեսզի շնորհակալական խոսքերը ասվեն ի սրտե: Շնորհակալությունն ու երախտագիտությունը արտահայտելոււ մասին չի կարելի մոռանալ տարվա և ոչ մի օր, իսկ Շնորհակալության միջազգային օրը պարզապես հիշեցնում է մեզ այդ մասին: Լայն բացված ժպիտով ու անկեղծորեն ասված այս բառը արևի պես ջերմացնում է մարդկանց հոգին: Նվիրենք միմյանց մի քիչ ջերմություն… Շնորհակալություն…

11.01.13