Բյուրեղավան քաղաքում գործող «ԳԼԱՍ ՈՒՈՐԼԴ ՔԱՄՓՆԻ» ապակե տարաների ձեռնարկությունն այսօր կանգնած է լուրջ ֆինանասական խնդիրների առջև: Պատճառը հանրապետությունում ստեղծված տնտեսական և ֆինանսական ծանր վիճակն է: Ընկերությունն ունի մոտ 322 աշխատող: Նրանց 85 %-ը բյուրեղավանցիներ են: Ընկերության աշխատակիցներն օրեր շարունակ գործարանի դռների մոտ բողոքի ցույցեր են կազմակերպել: Նրանք ընկերությունից պահանջում են վճարել իրենց հասանելիք աշխատավարձեը: Կուտակվել է 4 ամսվա պարտք, որը կազմում է 120 մլն դրամ: Այս խնդրով մտահոգված է քաղաքապետ Հակոբ Բալասյանը: Աշխատակիցներից շատերը դիմել են քաղաքապետին, խնդրել նրա օգնությունը: Օգոստոսի 10-ին Հակոբ Բալասյանն անձամբ հանդիպեց գործարանի աշխատակիցներին, լսեց նրանց դժգոհությունները խոստացավ՝ լուծումներ գտնել, ինչը և չուշացավ: Քաղաքապետի և «ԳԼԱՍ ՈՒՈՐԼԴ ՔԱՄՓՆԻ» ղեկավարության բանակցություն արդյունքում տնօրինությունը խոստացավ, մինչև օգոստոսի վերջ, կուտակված պարտքերը մարել: Ի դեպ գործընթացն արդեն սկսվել է: Ստեղծված իրավիճակից ելնելով Բյուրեղավան համայնքի ղեկավար Հակոբ Բալասյանը դիմել է <<Աբովյանի>> ԳԳՄ-ի և էլեկտրո ցանցերի տնօրինություններին, որ մինչև այս ամսվա վերջ փաստի առաջ կանգնած քաղաքացիների բնակարանների գազամատակարարումը չդադարեցվի և չհոսանքզրկվի: Դիմել է նաև ՀՀ Էկոնոմիկայի նախարարությանը հնարավորությաան սահմաններում աջակցել գործարանին՝ արտադրությունը վերականգնելու ուղղությամբ: Ձեռնարկությունն իր գործունեության 11 տարիների ընթացքում նման խնդրի առջև չի կանգնել: Մի քանի տարի հետ գնալով նշենք, որ գործարանի արտադրանքի 52%-ը արտահանվում էր արտերկիր, իսկ մնացած արտադրանքը սպառվում էր ներքին շուկայում: Ընկերության արտահանման աշխարհագրությունն ընդլայնվում էր` ընդգրկելով հիմնականում Վրաստան, հետո Ռուսաստան, ԱՄՆ¬ և Կանադա: Այժմ ձեռնարկության խնդիրները շատ են: Գազի և էլեկտրաէներգիայի վերջին թանկացումները, տարբեր ընկերությունների պայմանագրերի դադարեցումը, ռուբլու արժեզրկումն իրենց հետք թողեցին ընկերության արդադրության վրա: Այլ ընկերություններ գործարանին պարտք են 1,5 մլրդ դրամ: ՀՀ Կառավարության աջակցությամբ գործարանը ձեռք էր բերել նոր ապակու վառարան, որի արժեքը՝ 3,5 մլն եվրո է: Դրանից հետո գործարանը դադարեցրել է աշխատանքները: Հիմա ընկերության ղեկավարությունը փորձում է տարբերակներ գտնել և դուրս գալ այս դժվարին վիճակից: «ԳԼԱՍ ՈՒՈՐԼԴ ՔԱՄՓՆԻ» ընկերության գործունեության դադարեցումը լուրջ վնասներ կհասցնի նաև Բյուրեղավանի տնտեսությանը:

12.08.15.