Դեկտեմբերի 16-ին արվեստի դպրոցի դահլիճում տեղի ունեցավ հանրային լսումներ: Հանրությանը ներկայացվեց Բյուրեղավան համայնքի 2016թ-ի բյուջեի հակիրճ նախագիծը: Լսումներին ներկա էին՝ քաղաքապետ Հակոբ Բալասյանը, «Բյուրեղավան համայնքի զարգացման քառամյա ծրագրի և տարեկան բյուջեի կառավարման մարմնի» անդամները, քաղաքապետարանի աշխատակիցներ, համայնքի ավագանու անդամներ, համայնքային կազմակերպությունների տնօրեններ և աշխատակիցներ, բազմաբնակարան շենքերի լիազորներ, քաղաքի խնդիրներով մտահոգ բնակիչներ: Հրավիրված էին համայնքների ֆինանսիստների միություն հասարակական կազմակերպության «ՀաՄաՏեղ» ծրագրի փորձագետ Քնարիկ Այվազովան և Աբովյանի քաղաքապետարանի ֆինանսատնտեսական բաժնի պետի տեղակալ, GIZ կազմակերպության փորձագետ Աննա Չոբանյանը: Հանրային բաց լսումներ կազմակերպող հանձնաժողովի նախագահ Գրենա Զաքարյանը, ում վստահված էր վարել նիստը, ծանոթացրեց օրակարգին, որտեղ ընդգրկված էր մեկ հարց՝ Բյուրեղավանի քաղաքային համայնքի 2016թ-ի բյուջեի նախագծի քննարկումը: Օրակարգը հաստատելուց հետո Բյուրեղավանի քաղաքապետարանի ֆինանսատնտեսական բաժնի պետ Լիդիա Պողոսյանը ներկայացրեց Բյուրեղավան քաղաքային համայնքի 2016 թ-ի տարեկան բյուջեի նախագիծն ըստ եկամտային և ծախսային մասերի: Դրանք կազմում են. եկամտային գծով` 236211,2 հազար դրամ և ծախսային գծով` 236211,2 հազար դրամ: Համայնքի 2016թ-ի բյուջեն մշակվել է՝ հիմք ունենալով համայնքի 2012-2016 թթ զարգացման քառամյա ծրագիրը: Համայնքի 2016թ-ի զարգացման հիմնական ուղղությունները միտված են բնակչության կենսական շահերի ապահովմանը, շրջակա միջավայրի պահպանմանը, համայնքի հարմարավետ ու բարեկեցիկ միջավայրի ստեղծմանը, համայնքային ենթակառուցվածքների արդիականացմանն ու զարգացմանը, ինչպես նաև համայնքի գլխավոր հատակագծին համապատասխան քաղաքաշինական ծրագրերի իրականացմանը: «ՀաՄաՏեղ» ծրագրի փորձագետ Քնարիկ Այվազովան ներկայացրեց ՏԻՄ-երի կողմից կատարվող ծախսերի թափանցիկությունը ապահովելու նպատակով կազմված արդյունքահեն բյուջետավորման առանձնահատկությունները, նշեց, որ այդ առումով Բյուրեղավանը համարվում է առաջատար համայնք, քանի որ ընդունել է ԱԲ մեթոդաբանությունը և լավագույնս կիրառում է այն: Քաղաքապետ Հակոբ Բալասյանն առաջարկեց՝ բյուջեի նախագիծը ուղարկել ենթակա հիմնարկներ, հրապարակել byureghavan. am և սոցիալական կայքերով, որպեսզի մարդիկ իրազեկվեն: Հանրային լսումների ավարտին որոշվեց հավանության արժանացնել 2016 թ-ի բյուջեի նախագիծը և ներկայացնել ավագանու հերթական նիստին, որը կկայանա 2015 թ-ի դեկտեմբերի 21-ին:

17.12.15.