Անչափ շնորհակալ եմ այն աջակցության համար, որը ստացա ձեզանից: Ձեր վստահությունն արտահայտվեց ոչ միայն իմ օգտին քվեարկությամբ, այլև՝ ամենօրյա ջերմ շփումներով: Ինձ համար թանկ է ձեր կողմից ինձ տրված յուրաքանչյուր ձայն: Շնորհակալ եմ բոլոր կառույցներին, ովքեր սատարեցին ինձ՝ հատկապես մարզային իշխանություններին, իմ բոլոր համակիրներին ու կողմնակիցներին: Ես շնորհակալ եմ իմ թիմին՝ մեր թիմին: Հպարտ եմ այդ թիմով և իմ համաքաղաքացիներով: Ես շնորհակալ եմ բոլոր նրանց, ովքեր կարողացան գիտակցել պահի կարևորությունը և համատեղ ջանքերով անցկացնել արդար, թափանցիկ ընտրություններ: Շնորհակալ եմ նաև իմ մրցակցին և իմ չընտրողներին ընտրություններն ավելի մրցակցային և հաղթանակն ավելի համոզիչ դարձնելու համար: Համոզված եմ, որ մենք միասին, համատեղ ուժերով կկարողանանք զարգացնել ու բարեկարգել մեր քաղաքը, իրականացնել լուրջ փոփոխություններ: Ես ոչ մի անգամ խոստումներ չեմ տվել, այլ ուղղակի աշխատել եմ՝ բարեխղճորեն կատարելով օրենքով իմ առջև դրված պարտականությունները, և հնարավորինս իրականացրել եմ իմ համաքաղաքացիների ցանկությունները: Այս ընտրություններով բյուրեղավանցիները ևս մեկ անգամ ապացուցեցին, որ գնահատում են իմ կատարած աշխատանքը: Եվ դա ինձ պարտավորեցնում է, որ այսուհետ շարունակեմ գործել, զարգացնել համայնքը և լինել քաղաքացու կողքին: Ես երջանիկ եմ ու հպարտ, կրկին առաջնորդվելու եմ իմ կարգախոսով՝ «ԿԱՄՔ, ՆՎԻՐՈՒՄ, ԱՇԽԱՏԱՆՔ»: Վստահեցնում եմ առաջիկա տարիներին աշխատելու եմ ձեզ հետ և ձեր աջակցությամբ իրականացնելու եմ նոր ծրագրերն ի շահ Բյուրեղավանի և բյուրեղավանցու: Կրկին ՇՆՈՐՀԱԿԱԼ ԵՄ բոլորիդ:

19.04.16.