Այս կիրակի Բյուրեղավանի ավագ դպրոցի մարզադահլիճում տոնական մթնոլորտ էր: Տեղի ունեցավ Բյուրեղավանի արվեստի դպրոցի խորեոգրաֆիայի բաժնի այս տարվա հաշվետու համերգը: Համերգին ներկա էր Բյուրեղավանի քաղաքապետ Հակոբ Բալասյանը, քաղաքապետարանի աշխատակիցներ, ուսուցիչներ, արվեստի դպրոցի դասատուներ, աշակերտներ, ծնողներ, հյուրեր: Քաղաքապետը մշտապես արվեստի դպրոցի կողքին է և կարևորում է ակտիվ մշակութային կյանքը քաղաքում: Բյուրեղավանի արվեստի դպրոցի խորեոգրաֆիայի բաժինը բացվել է 2008 թվականին: Բաժնի ղեկավարն է պարուսույց Սյուզաննա Զաքարյանը: Բաժինն իր պատմությունը սկսեց 35 աշակերտներից, տարիների ընթացքում համալրվեց նոր երեխաներով: Այսօր նրանց թիվը անցնում է ութսունից: 5-15 տարեկան՝ տարիքային խմբերով ներկայացան դպրոցի սաները՝ նախապատրաստականից մինչև ավարտական: Հանդիսատեսին ներկայացրեցին այն պարերը, որոնք սովորել էին վերջին տարիների ընթացքում, իսկ դրանք բազմաժանր էին՝ հայկական, վրացական, ռուսական, ուկրաինական, լատինաամերիկյան և այլն: Պարերին համապատասխան շքեղ զգեստներն էլ ավելի էին գեղեցկացնում կատարումները: Միջոցառմանը ելույթ ունեցան նաև դպրոցի ժողգործիքների անսամբլը: Գեղեցիկ համարներով հանդես եկան նաև ժողովրդական նվագարանների խմբի մենակատարները: Հաշվետու համերգը եզրափակեց ավարտական դասարանի աշակերտուհի Էմմա Հովսեփյանը, ով կատարեց Խաչատուր Ավետիսյանի <<Ճերմակ աղավնի>> պարը, որն ի դեպ, առաջին անգամ էր հանձնվում հանդիսատեսի դատին: Միջոցառման վերջում շնորհակալական խոսքեր ասաց քաղաքապետ Հակոբ Բալասյանը: Քաղաքապետն իր խոսքում նշեց, որ շատ է կարևորում արվեստի դպրոցի դերը Բյուրեղավան քաղաքի մատաղ սերնդի գեղագիտական դաստիարակության գործում և սիրով է աջակցում նրանց աշխատանքներին: Բարձր է գնահատում դպրոցի մասնակցությունը նաև համաքաղաքային միջոցառումներին: Քաղաքապետը շնորհակալություն հայտնեց Սյուզաննա Զաքարյանին, դպրոցի բոլոր դասատուներին և տնօրեն Նարինե Զաքարյանին՝ իրենց տքնաջան աշխատանքի համար: Շնորհակալական խոսքեր ասաց արվեստի դպրոցի տնօրեն Նարինե Զաքարյանը. <<Սա մեր քննությունն է ծնողներին, որպեսզի նրանք տեսնեն թե իրենց երեխաներն ինչ հաջողությունների են հասել և ինչ ձեռքբերումներ ունեն>>: Վերջում գեղարվեստական ղեկավար, պարուսույց Սյուզաննա Զաքարյանն իր սաներին հանձնեց պարարվեստը խորհրդանշող հուշանվերներ:

31.05.16.