ՀՀ Երաժշտական ընկերությունը՝ կոմպոզիտոր Դավիթ Ղազարյանի գլխավորությամբ, ՀՀ կրթության և գիտության նախարարության գեղարվեստական դաստիարակության մշակույթի կենտրոնի հետ համատեղ, Հայաստանի Հանրապետության անկախության 25-րդ տարեդարձին, ինչպես նաև հայ երաժշտարվեստի մեծ երախտավոր Թաթուլ Ալթունյանի ծննդյան 115-ամյակին նվիրված հոբելյանական միջոցառումների շրջանակներում, այս տարվա սեպտեմբեր-հոկտեմբեր ամիսներին իրականացնում է ժողովրդական նվագարանների անսամբլների հանրապետական առաջին մրցույթ – փառատոնը: Հանրապետական փառատոնի առաջին փուլի լսումները սկսված են: Բյուրեղավանի արվեստի դպրոց էր հյուրընկալվել փառատոնի առաջին փուլի հանձնաժողովի կազմը՝ ՀՀ վաստակավոր արտիստ, կոմպոզիտոր-դաշնակահար Գևորգ Մանասյանը, ՀՀ վաստակավոր արտիստ, դուդուկահար Գեորգի Մինասովը, ՀՀ մշակույթի նախարարության կրթության աջակցման հիմնադրամի տնօրեն Նելլի Սարգսյանը և ՀՀ ԿԳ նախարարության ներկայացուցիչ Տիգրան Բալոյանը: Բյուրեղավան համայնքի ժողովրդական նվագարանների անսամբլի երեք կատարումը ուղղակի հիացրեց հանձնաժողովի կազմին: Մերոնք ներկայացրել էին Խ. Ավետիսյանի «Էթնոգրաֆիկ պար», Աշուղ Միջազի «Քեռին» և ժողովրդական պարերի շարան՝ «Հունձ» ստեղծագործությունները: Անսամբլի գեղարվեստական ղեկավար Նարինե Զաքարյանը վստահեցրեց, որ սպասելիքներ կան և հնարավոր է մեր անսամբլն անցնի երկրորդ փուլ, որը տեղի կունենա հոկտեմբերի 22, 23-ին Երևանում:

12.10.16.