Սիլվա Մուկոյանին շնորհվեց Բյուրեղավանի պատվավոր քաղաքացու կոչում: Մարդ, ով իր աշխատանքային գործունեության տարիներին մեծ ներդրում է ունեցել Բյուրեղավան քաղաքի կրթամշակութային կյանքում: Իր կյանքի 40 տարիները նվիրել է Բյուրեղավանի երեխաների կրթության և գեղագիտական դաստիարակության գործին: Սիլվա Սերգեևնա- այսպես են կոչում նրան: Սիլվա Սերգեևնան դեկտեմբերի 2-ին տոնեց իր ծննդյան 70 ամյակը: Հոբելյարին այդ օրը սպասվում էր անակնկալ: Անակնկալը չսպասված էր ու հաճելի: Համայնքի ղեկավար Հակոբ Բալասյանի առաջարկով նոյեմբերի 21-ին նորընտիր ավագանու նիստով միաձայն ընդունվեց Սիլվա Մուկոյանին շնորհել Բյուրեղավանի պատվավոր քաղաքացու կոչում: Հոբելյարի ծննդյան միջոցառման ժամանակ քաղաքապետը շնորհավորեց և պատվավոր քաղաքացու կոչման վկայականը հանձնեց հասցեատիրոջը. «Մեր շատ սիրելի Սիլվա Սերգեևնա, ես բարձր եմ գնահատում Ձեր տարիների աշխատանքը, դուք արժանի եք այս կոչմանը: Այսօր մի յուրօրինակ առիթ է երախտագիտության ու շնորհակալության խոսքեր հայտնելու Ձեզ, գնահատելու և մեծարելու Ձեր վաստակը: Շնորհավորելով Ձեզ այս գեղեցիկ օրվա առիթով` առողջություն ու ստեղծագործական նորանոր հաջողություններ եմ մաղթում՝ Ձեր շնորհակալ և հայրենանվեր առաքելության ճանապարհին»: Միշտ նրբագեղ ու կանացի, արվեստին մոտ կանգնած տիկինը այժմ էլ շարունակում է նույն ավյունով աշխատել ու ճաշակ ձևավորել բյուրեղավանցի երեխաների մեջ: Հակոբ Բալասյանի վերաբերմունքից տիկին Մուկոյանը հուզված ու շփոթված մի կերպ կարողացավ արտահայտել այդ պահին իր զգացողությունները. «Եթե կարելի է ասել, որ ես ուրախ եմ, դա քիչ է: Դա մի անբացատրելի զգացողություն է, երբ բառերով չես կարողանում արտահայտել քո ներսի զգացածը: Հակոբ Սուրենիչ /այսպես է նա դիմում քաղաքապետին/, սա իմ կյանքում թերևս ամենարժեքավորն է, որ պարգևեցիք ինձ: Որքան անսպասելի էր, այնքան և հաճելի: Շնորհակալ եմ բոլորին, իսկ առաջին հերթին քաղաքապետին»: Սիլվա Մուկոյանը Բյուրեղավան համայնքի երրորդ պատվավոր քաղաքացին է:

06.12.16