Փետրվարի 19-ին Թերթ. am-ը հրապարակել էր «Բյուրեղավանում միայնակ մայրը, 3 անչափահաս երեխաներն ու հաշմանդամ տատիկը հայտնվել են փողոցում» վերնագրով հոդված-տեսանյութ: Հոդվածում ներկայացվում էր Նարինե Մարգարյանի և իր երեք անչափահաս երեխաների փողոցում հայտնվելու փաստը: Նրանց մասին պատմող նյութը ստացել էր հանրային հնչեղություն: Հրապարակումից անմիջապես հետո Բյուրեղավան համայնքի ղեկավար Հակոբ Բալասյանի հանձնարարականով ստեղծվեց աշխատանքային խումբ, որը սկսեց ուսումնասիրել խնդրի հետ կապված հանգամանքները: Եղան հանրակացարանի այն սենյակում, որ ժամանակավոր նրան էր տրամադրել նախկին հարևանուհին: Զրուցեցին Նարինեի հետ, պարզեցին որոշ մանրամասներ: Ներկայացրեցին քաղաքապետ Հակոբ Բալասյանի կողմից ցուցաբերվող առաջնահերթ աջակցությունները, որոնք կապված էին հիմնականում երեխաների խնամքի, սննդի, կացարանով ապահովման, ընտանեկան նպաստը վերականգնելու փաստի հետ: Որոշակի բացատրական աշխատանքներ տանելուց հետո Նարինե Մարգարյանը համաձայնեց քաղաքապետի կողմից առաջարկված պայմանների հետ: Նարինե Մարգարյանի ընտանիքն արդեն մի քանի օր է օգտվում է Բյուրեղավանում գործող բարեգործական ճաշարանից, ստանում է հինգ հոգուն հասանելիք սնունդը: Ընթացքի մեջ է երեխաներին խնամքի կենտրոնում տեղավորելու հարցը: Շուտով նրանք կտեղափոխվեն այլ սենյակ, որի վարձակալության գումարը առաջիկա ամիսներին կտրամադրվի քաղաքապետի կողմից: Հ. Գ Նրա ընտանեկան պատմությունը շատ խճճված է: Ուսումնասիրությունների արդյունքում նրա կողմից տրված տեղեկատվությունը Թերթ. am-ին խիստ հակասական էր և հիմնականում չէր համապատասխանում իրականությանը: Պահպանելով լրագրողական էթիկայի կանոնները նրա անձնական կյանքի մանրամասները չենք հրապարակում:

24.02.17