2008թ-ին, երբ Հակոբ Բալասյանը համայնքի ղեկավարի թեկնածու էր, իր նախընտրական ծրագրում առաջնահերթ խնդիրներից մեկը համարել էր համայնքի մաքրության հարցը: Ընտրվելուց հետո, քաղաքապետն անմիջապես ձեռնմուխ եղավ համապատասխան տնտեսության ստեղծման աշխատանքներին: Տեխնիկա և տնտեսություն, որոնք պետք է իրականացնեին համայնքի բարեկարգման, կանաչապատման և սանմաքրման աշխատանքները: Ճիշտ է, այսօր էլ տեխնիկան դեռևս հեռու է նոր ու ժամանակակից լինելուց, սակայն պահանջկոտ և սրտացավ ղեկավարը կարողանում է աշխատանքներն այնպես կազմակերպել, որ Բյուրեղավանը հանրապետության մեծ քաղաքաներից հետ չընկնի, և ավելին` արժանանա «ՄԱՔՈՒՐ ՀԱՄԱՅՆՔ 2016» անվանակարգով մրցանակին: Փետրվարի 24-ին Բյուրեղավան համայնքի ղեկավար Հակոբ Բալասյանը ներկա է գտնվել Հայաստանի համայնքների միության (ՀՀՄ) անդամների ընդհանուր ժողովին, որի նպատակն էր ամփոփել Միության վերջին տարիների գործունեությունը, ներկայացնել Միության ձեռքբերումները և 2016-2020թթ․ ռազմավարությունը։ Բացման և ողջույնի խոսքերով հանդես են եկել ՀՀ տարածքային կառավարման և զարգացման նախարար Դավիթ Լոքյանը, ՀՀՄ նախագահ Էմին Երիցյանը: Միջոցառման ավարտին տեղի է ունեցել Հայաստանի համայնքների միության և ՀՀ տարածքային կառավարման և զարգացման նախարարութան կողմից համատեղ անցկացվող «Տարվա լավագույն համայնք» ավանդական մրցանակաբաշխության արարողությունը։ Ամենամյա այս միջոցառման նպատակն է ավելի թափանցիկ ու հրապարակային դարձնել համայնքների գործունեությունը, ինչպես նաև ձևավորել առողջ մրցակցություն՝ խթանելով տեղական ինքնակառավարման մարմինների գործունեության արդյունավետության բարձրացմանը։ Մրցանակաբաշխության ընթացքում ՀՀ տարածքային կառավարման և զարգացման նախարար Դավիթ Լոքյանը՝ «ՄԱՔՈՒՐ ՀԱՄԱՅՆՔ 2016» անվանակարգով հավաստագիրը հանձնել է մեր համայնքի ղեկավարին:

26.02.17