«Բյուրեղավանի քաղաքային պոլիկլինիկա» ՓԲԸ-ում անցկացվեց «Բաց դռների օր» միջոցառում: Քաղաքային պոլիկլինիկայի տնօրեն Միքայել Միքայելյանը նշեց, որ նախապես իր կողմից հանձնարարվել էր ընտանեկան բժիշկներին՝ տեղեկացնել հիվանդներին: Հայտարարություն էր տեղադրվել Byureghavan. am կայքում, որպեսզի ազգաբնակչությունը տեղեկացված լինի միջոցառման մասին: Մինչ միջոցառման օրն արդեն գրանցվել էին 486 այցելու՝ տարբեր մասնագետների մոտ: Մասնագիտական խումբը կազմված էր 10 բժիշկներից: Խումբը ղեկավարում էր Երևանի «Գրիգոր Լուսավորիչ» ԲԿ-ի նյարդաբան Գոհար Սահակյանը: «Բաց դռների օր» միջոցառման շրջանակներում Բյուրեղավանի պոլիկլինիկայում ակնաբույժ, մանկաբույժ, սրտաբան, մաշկավեներոլոգ, վնասվածքաբան, ուռուցքաբան, ուրոլոգ, էնդոկրինոլոգ, նյարդաբան և գինեկոլոգ մասնագետների մոտ սպասարկվել են 292 բյուրեղավանցիներ: Ստացիոնար հետազոտման և բուժման ցուցում է տրվել 13 մարդու: Միջոցառմանը ներկա էր նաև Կոտայքի մարզպետարանի առողջապահության և սոցիալական ապահովության վարչության պետ Վահագն Ոսկանյանը: Վ. Ոսկանյանը շրջել է բոլոր կաբինետներով և հետևել աշխատանքների ընթացքին: «Հիվանդները հիմնականում այցելել են ակնաբույժի, սրտաբանի և նյարդաբանի կաբինետներ: Մեր կողմից կազմակերպչական աշխատանքները կատարվել են հավուր պատշաճի: Լարվածություն, դժգոհություն չի եղել ոչ հիվանդների և ոչ էլ բժիշկների կողմից»- վերջում փաստեց պոլիկլինիկայի տնօրենը:

17.03.17