Խոշորացված Բյուրեղավան համայնքի ղեկավար Հակոբ Բալասյանն աշխատանքային այցով Ջրաբեր գյուղում էր: Համայնքի ղեկավարի հետ էին համայնքի ղեկավարի տեղակալ Միշա Եղիազարյանը, «Բյուրեղավան» համատիրության նախագահ Արգամ Շառյանը, «Բարեկարգում և կանաչապատում» ՀՈԱԿ-ի տնօրեն Հայկ Եղյանը: Այցելության նպատակն էր` տեղում տեսնել ու ծանոթանալ գյուղի առաջնային խնդիրներին: Ջրաբերի նախկին գյուղապետ, այսօր արդեն վարչական ղեկավարի լիազորություններն իրականացնող Գևորգ Հայրապետյանը, լավատեղյակ լինելով գյուղացու հոգսերին, համայնքի ղեկավար Հակոբ Բալասյանին մանրամասն ներկայացրեց այն խնդիրները, որոնք դեռևս լուծում չեն ստացել: Գյուղն ունի երկու լուրջ խնդիր՝ խմելու ջրի ներքին ցանցերի վերանորոգումը և անխափան էլեկտրաէներգիայով ապահովումը: Բացի միջնակարգ դպրոցից գյուղում կրթական ոչ մի կառույց չկա: Հակոբ Բալասյանն առաջարկեց (այն նաև նրա ծրագրային դրույթներում է նշված), բարձրացնել բնակչությանը մատուցվող ծառայությունների որակը, կատարել ներդրումներ և սեփական բյուջեի միջոցներով բացել նախակրթարան, որպեսզի երեխաները նախնական կրթությունը ստանան գյուղում: Նախակրթարանը կլինի գյուղի դպրոցին կից: Խոսվեց աղբահանության, սանմաքրման ու բարեկարգման աշխատանքների մասին: Նշվեց, որ այդ աշխատանքները Ջրաբերում ևս կիրականացվեն այնպես, ինչպես Բյուրեղավան քաղաքում: Ջրաբերն ամբողջովին ապահոված է գիշերային լուսավորությամբ, գազաֆիկացված է, ունի բժշկական ամբուլատորիա: 120 ծուխ այսօր ապրում է այստեղ: Հանդիպման վերջում Բյուրեղավան համայնքի ղեկավար Հակոբ Բալասյանը նշեց, որ սերտ համագործակցության շնորհիվ դրական արդյունքները կարձանագրվեն շուտով :

25.11.17