Ապրիլի 12-16 Չեխիայի մայրաքաղաք Պրահայում տեղի ունեցավ Սամբոյի Եվրոպայի պատանիների, աղջիկների, երիտասարդների առաջնությունը: Բյուրեղավանի մարզադպրոցի սան Մելինե Մամիկոնյանը՝ մարզիչ Արփինե Սուքիասյան, ընդգրկված էր Հայաստանի ազգային հավաքականում և առաջին անգամ մասնակցում էր Եվրոպայի առաջնությանը: Մարզիկի Եվրոպա մեկնելու ծախսերն իր վրա էր վերցրել Բյուրեղավան համայնքի ղեկավար Հակոբ Բալասյանը: Այսօր Մելինեն արդեն Հայաստանում է և իր բրոնզե մեդալով հյուրընկալվել է համայնքի ղեկավարին: Մելինեին ուղեկցում էին մայրը և մարզադպրոցի ներկայացուցչական կազմը: 44 կգ քաշային Մելինե Մամիկոնյանը, չունենալով փորձ միջազգային մրցաշարերում, կարողացավ մրցապայքարի մեջ մտնել ուժեղագույն ու փորձառու մարզիկների հետ և արժանանալ բրոնզե մեդալի: Համայնքի ղեկավարը ողջունեց և շնորհավորեց Մելինե Մամիկոնյանին. «Շնորհավորում եմ քեզ Մելինե, արդարացրիր բոլորիս հույսերը: Շնորհակալ ենք նաև քո մարզիչին: Մեր մարզադպրոցը տվել է լավ մարզիկներ և բարձր է պահել մեր համայնքի պատիվը: Աղջիկս, քեզ հաջողություններ ենք մաղթում: Կփորձենք հետագայում ևս աջակցել, որպեսզի կարողանաս քո ճանապարհը հարթես մեծ սպորտում: Ես ինձ լավ եմ ձգում, երբ դուք վերադառնում եք բարձր արդյունքներով»: Մելինեն շատ տպավորված էր մրցաշարից և համայնքի ղեկավարին խոստացավ. «Լավ կպարապեմ, որպեսզի կարողանամ մասնակցել աշխարհի առաջնությանը և անպայման վերադառնալ ոսկի մեդալով»: Մելինեն առաջին գոտեմարտի ժամանակ մի փոքր հուզված է եղել, հետո արդեն ուժերը հավաքելով կարողացել է հասնել հաղթանակի: Մարզադպրոցի տնօրեն Նորիկ Տերտերյանը մարզադպրոցի անունից խորին շնորհակալություն հայտնեց աջակցության համար. «Ինչքան էլ աշխատենք, պետք է անպայման միջազգային մրցումների մասնակցենք, որպեսզի արդյունքները ավելի տեսանելի լինեն: Եթե չլիներ Ձեր աջակցությունը, այս մեդալը ևս չէր լինի և մենք այս ուրախությունը չէինք տոնի»: Հիմա Մելինե Մամիկոնյանը պատրաստվելու է Վրաստանում կայանալիք աշխարհի առաջնությանը:

17.04.18