Քնարիկ Հովհաննիսյան. կարծես ոչինչ չասող այս անուն-ազգանունն իրականում իր մեջ ներառում է արվեստի մի ամբողջություն: Ի վերուստ ունեցած տաղանդը, որին գումարվում է Բյուրեղավանի արվեստի դպրոցի տված երաժշտական կրթությունը, Քնարիկին դարձնում է ինքնատիպ ու հրաշալի երգչուհի: Օրերս Քնարիկ Հովհաննիսյանի մենահամերգն էր, որը տեղի ունեցավ Երևանի Արամ Խաչատրյան տուն - թանգարանի հյուրընկալ համերգասրահում: Լեփ-լեցուն դահլիճում Քննարիկին ողջունելու էին եկել հարազատները, ընկերները, «Բյուրեղավանի Շառլ Ազնավուրի անվան արվեստի դպրոցի» կոլեկտիվն ու սաները՝ տնօրեն Նարինե Զաքարյանի գլխավորությամբ, ՀՀ ժողովրդական արտիստ, սոպրանո Հասմիկ Պապյանը, մշակույթի աջակցության հիմնադրամի տնօրեն Նելլի Սարգսյանը և նրա արվեստը սիրող երկրպագուներ: Քնարիկն իր երաժշտական կրթությունը ստացել է ակադեմիական վոկալ- երգեցողություն բաժնում՝ դասատու Արմինե Կիրակոսյան: Ունենալով լավ երաժշտական տվյալներ՝ մասնակցել ու շարունակում է մասնակցություն ունենալ տարբեր մարզային, հանրապետական և միջազգային մրցույթ- փառատոններին՝ բարձր պահելով Բյուրեղավան քաղաքի, արվեստի դպրոցի անունը: Մենահամերգն անցել է հետաքրքիր ու բովանդակալից: Օրվա հերոսը կատարել է բազմաբնույթ ստեղծագործություններ հայ և արտասահմանյան կոմպոզիտորներից՝ Կոմիտաս, Խաչատուր Ավետիսյան, Ռոբերտ Ամիրխանյան, արիաներ, ռոմանսներ և այլն: Քնարիկին նվագակցում էր հարազատ դպրոցի ազգային նվագարանների անսամբլը. գեղարվեստական ղեկավար՝ Նարինե Զաքարյան, կոնցերտմայստեր՝ Նունե Մելքսեթյան: Նա իսկապես իր ձայնով զարմացրել ու գերել է հանդիսատեսին: Համերգի ավարտին ողջ դահլիճը հոտնկայս ծափահարել է մեր երգչուհուն:

11.04.19