Աշխատանքային այցով այսօր Բյուրեղավան քաղաքում էր Կոտայքի մարզպետ Ռոմանոս Պետրոսյանը: Բյուրեղավան համայնքի ղեկավար Հակոբ Բալասյանի ուղեկցությամբ մարզպետն այցելեց Բյուրեղավանի ավագ և հիմնական դպրոցներ, տեղում ծանոթացավ առկա խնդիրներին: Հիմնական դպրոցի առաջին դասարանցիներն այս պահին ուսում են ստանում ավագ դպրոցում: ՀՀ կրթության նախարարի և Կոտայքի մարզպետի պայմանավորվածության համաձայն ավագ դպրոցի 4 դասասենյակ ժամանակավոր տրամադրել են հիմնական դպրոցի առաջիններին: Մարզպետը եղավ դասասենյակներում, շփվեց երեխաների հետ: Այնուհետև աշխատանքային խումբն այցելեց հիմնական դպրոց, որտեղ ամառային արձակուրդներին դպրոցի խնայողությունների հաշվին կատարվել են շինարարական աշխատանքներ՝ ամբողջովին փոխվել են դռներն ու պատուհանները, ցանկապատվել է դպրոցի տարածքը: Մարզպետին հետաքրքրում էր «Դպրոցական տաք սնունդ» ծրագրի շրջանակներում իրականացվող ճաշարանի բացման հարցը: Տարվել են որոշակի աշխատանքներ և մինչև հոկտեմբերի 15-ը այն կբացվի: Դպրոցների տնօրեններին հանձնարարվեց նկատել որոշակի խնդիրները լուծել սեղմ ժամկետներում: Արդեն տեղեկացրել ենք, որ համայնքների տնտեսական և սոցիալական զարգացմանն ուղղված Կառավարության 2019 թվականի սուբվենցիոն ծրագրով Բյուրեղավան քաղաքում իրականացվել և իրականացվում են ներհամայնքային ճանապարհների ասֆալտապատման աշխատանքներ: Աշխատանքներին ծանոթանալու համար մարզպետ Ռոմանոս Պետրոսյանի հաջորդ կանգառն այն թաղամասերում է, որտեղ ասֆալտապատման աշխատանքներ են կատարվում՝ 1-ին թաղամաս, Հայրենադարձ թաղամաս և մշակույթի կենտրոնի դիմահայաց տարածք: Համայնքի ղեկավար Հակոբ Բալասյանը մարզպետին ներկայացրեց կատարված աշխատանքների ընդհանուր պատկերը: 1-ին թաղամասում բնակիչներն իրենց խորին շնորհակալությունը հայտնեցին կառավարությանն ասֆալտապատման աշխատանքներին աջակցելու համար:

01.10.19