Բյուրեղավանի համայնքապետարանը Հայկական բանակի 28 ամյակի առթիվ կազմակերպել էր գրքի շնորհանդես: Շնորհանդեսը տեղի ունեցավ հիմնանորոգված մշակույթի տան փոքր դահլիճում: Գիրքը, որի խորագիրն է «Բյուրեղավանի արծիվները» պատմում է հերոս բյուրեղավանցիների մասին, նրանց մասին, ովքեր իրենց կյանքը զոհաբերեցին հանուն մեր կյանքի: Բյուրեղավանից շատերն են մասնակցել Արցախյան հերոսամարտին, սակայն գրքում ներառվել են կոնկրետ մարտական գործողությունների արդյունքում հերոսացած տղաները։ 13 անուններ, որոնք հերոսացան և օրինակ դարձան սերունդների համար։ Գրքի շնորհանդեսը տեղի ունեցավ հուզմունքի ու երախտագիտության մթնոլորտում։ Ներկաները հիմնականում 13 հերոս տղաների հարազատներն էին: ․․․Ինչպես ծնվեց այս գիրքը։ Ծնվեց, որովհետև նպատակ էր, ու դրա կարիքը կար: Բյուրեղավանցի զոհված տղաների հիշատակն անմահացնել, նրանց սխրանքը մատաղ սերնդին փոխանցել և գաղափարը գրքի տեսքով հանրությանը ներկայացնել՝ այս բոլորը տարիներ շարունակ եղել է համայնքի ղեկավարի մտքում։ Եվ ահա 2019 թվականին գաղափարը միահյուսվեց Ջուլիետա Ասատրյանի ստեղծագործ մտքին, ով ինքնաբուխ, հոգու, սրտի թելադրանքով սկսեց պրպտել, հավաքագրել «արծիվների» կյանքի, սխրագործությունների վերաբերյալ ամեն մանրամասնություն։ Հավաքած նյութերը դարձան ամփոփ տեղեկատվություն, տեղեկատվությունը՝ գիրք: «Բյուրեղավանի արծիվները» գրքի գաղափարի մասին խոսեց համայնքի ղեկավար Հակոբ Բալասյանը: Ներկայացրեց պատմությունը՝ սկզբից մինչև վերջ: Շնորհակալություն հայտնեց իր ուսուցչուհուն՝ գրքի հեղինակ Ջուլիետա Ասատրյանին՝ գաղափարն իրականություն դարձնելու համար։ Տպավորություններով կիսվեցին ՀՀ գրողների միության անդամ Հայկազ Խնկոյանը, Բյուրեղավանի պատվավոր քաղաքացի Սիլվա Մուկոյանը, գրականագետ Ալեքսանդր Տեր Թադևոսյանը, արցախյան ազատամարտում զոհված Սարգիս Գյուլումյանի մայրը՝ տիկին Սոնյան: Բոլորը հուզված էին, քանզի միջոցառումն իրենց համար կարևոր իրադարձություն էր: Գրքի շնորհանդեսն ավարտվեց գրքի հեղինակի, բյուրեղավանցիների սիրելի ընկեր Ասատրյանի ջերմ ու հայրենաշունչ խոսքով:

28.01.20