Ապրիլի 9-ին Կոտայքի մարզպետարանի դահլիճում տեղի ունեցավ «Կոտայք-2014» երգարվեստի մարզային մրցույթ փառատոնը: Մրցույթի նպատակն է` բացահայտել մարզի շնորհալի երիտասարդներին, նպաստել նրանց կատարողական արվեստի զարգացմանը, իսկ լավագույններին` խրախուսել: Մրցույթն անց է կացվում երկրորդ տարին, և ինչպես նշեց Կոտայքի մարզպետ Կ. Շահգալդյանը «բռնել է ավանդույթ դառնալու ճանապարհը»: Մրցույթն անց կացվեց երկու անվանակարգերում` էստրադային և ժողովրդական: Մասնակցության հայտ էին ներկայացրել մարզի 14 համայնքների 40 շնորհալի երիտասարդներ: Կոտայքի մարզպետի տեղակալ Կ. Մարգարյանը համերգի սկզբում ողջունեց, շնորհակալություն հայտնեց և բարի ընթացք մաղթեց ժյուրիին և բոլոր մասնակիցներին: Ժյուրիի անդամներն էին` ՀՀ վաստակավոր արտիստներ Արսեն Գրիգորյանը (Մրո), Լեյլա Սարիբեկյանը, «Արև» մանկական համույթի գեղարվեստական ղեկավար Արփինե Դիվանյանը և Երևանի պետական կոնսերվատորիայի դոցենտ Արմանուշ Հակոբյանը: Բյուրեղավան համայնքը ներկայացնում էր երիտասարդ երգիչ Ռուբեն Իշխանյանը: Նրա կատարմամբ հնչեց Ֆրենկ Սինատրայի «Իմ ուղին» (My way) ստեղծագործությունը, որն արժանացավ ժյուրիի և հանդիսատեսի հիացմունքին և ամենաբարձր գնահատականին: Ռուբենը պարգևատրվեց Կոտայքի մարզպետի կողմից սահմանված «Գրան պրի» մրցանակով:

10.04.14.