Բյուրեղավանի մարզադպրոցում կայացավ սամբո ըմբշամարտի մանկապատանեկան բաց առաջնություն: Առաջնությանը մասնակցում էին շուրջ 140 մարզիկներ՝ Աբովյանից, Զառից, Եղվարդից, Արտաշատից: Ամենամեծ պատվիրակությունը ներկայացնում էր Բյուրեղավան քաղաքը՝ 50 մասնակից: Մրցաշարի հանդիսավոր բացմանն իր ներկայությամբ պատվել էր քաղաքապետ Հակոբ Բալասյանը: Նրա հետ էին նաև քաղաքապետարանի ներկայացուցիչներ: Մարզադպրոցի տնօրեն Նորիկ Տերտերյանը շնորհավորեց և հաջողություններ մաղթեց մրցաշարի մասնակիցներին: Ներկաները 1 րոպե լռությամբ հարգեցին ԽՍՀՄ սպորտի վարպետ, վաստակավոր մարզիչ Վաղինակ Շահինյանի հիշատակը: Մարդ, ով իր մարզական ճանապարհը սկսել էր Բյուրեղավանից: Հակոբ Բալասյանը մեծ ուրախությամբ ողջունեց հյուրընկալված մարզիկներին: Նա դիմեց մարզադպրոցի ղեկավարությանը, մարզիչներին և մարզիկներին՝ նշելով. «Շատ կարևոր գործ եք անում,քանի որ նպաստում եք սպորտաձևի մասսայականացմանը: Այսօր պարտվողներ չեն լինելու: Հաղթելու եք բոլորդ, հաղթելու է սպորտը, հաղթելու է համերաշխությունը: Շնորհակալություն մրցաշարի կազմակերպիչներին»: Բյուրեղավանի մարզադպրոցի սամբիստներն ուժեղագույնների շարքում էին: Մարզիչներ Արփինե Սուքիասյանը, Վահրամ Ապրեսյանը և Վարդան Նալբանդյանն անում են ամեն ինչ, որ մարզաձևը զարգանա և մասսայական դառնա: Դրա վառ ապացույցն է այն, որ մեր մասնակիցների զգալի մասը Հայաստանի Հանրապետության չեմպիոններ են: Մրցաշարում բարձր արդյունքներ գրանցեցին աղջիկներից՝ Իրինա Հունանյանը՝ 44կգ, Նազելի Հովհաննիսյանը՝ 40կգ և Վլադիկ Հարությունյանը՝ 53կգ: Սամբո ըմբշամարտի առաջնությունն ամենամյա է: Հիմքը դրվել է 1989թ-ին: Մրցաշարը տևեց 1 օր, հաղթողները պարգևատրվեցին պատվոգրերով և մեդալներով:

28.04.14.