Տարեցտարի նոսրանում է Հայրենական Մեծ պատերազմի մասնակից վետերանների շարքերը: Բյուրեղավանում այսօր մնացել է միայն 95-ամյա Սոկրատ պապը: Նա ևս հայ ժողովրդի մի մասնիկն է, ով կռվեց ու վիրավորվեց հանուն սովետական բազմազգ երկրի: Սոկրատ Գրիգորյանը ծնունդով Արցախից է: Բյուրեղավանում բնակություն է հասատել 1990թ-ից, ընտանիքով փախել է Բաքվի ջարդերից: Նրան վերջին տարիներին անձամբ այցելում և Մայիսի 9-ի առիթով շնորհավորում է քաղաքապետ Հակոբ Բալասյանը: Ավանդույթը չխախտելով այս տարի ևս քաղաքապետը հյուրընկալվեց վետերանին: Քաղաքապետը դատարկաձեռն չէր եկել, նա Սոկրատ պապին դրամական աջակցություն էր բերել: Հանդիպումն անցավ ջերմ ու մտերմիկ մթնոլորտում: Սոկրատ պապը վերհիշեց, որ Սովետական բանակ է զորակոչվել 1942թ-ին`Հյուսիսային Կովկասի Մազդոկ քաղաք: Ծառայել է հետևակային գնդում, եղել է ականանետային գումարտակի հրամանատար: 1946թ զորացրվել է և վերադարձել հայրենի գյուղ, շարունակել աշխատանքը: Այնուհետև տեղափոխվել է Բաքու, աշխատել նավթամշակման արդյունաբերության մեջ: Հիշեց իր կատարած սխրանքները, ապա տխրեց, որ վետերան ընկերներն էլ չկան: Շնորհակալություն հայտնեց քաղաքապետին և կատակով նշեց. <<Պակաս տեղ չունեմ Հակոբ ջան: 129 տարի ապրելու եմ, խոսք եմ տալիս: Շնորհակալ եմ քեզ, որ միշտ հիշում ես մեզ>>: Քաղաքապետը շնորհավորեց Սոկրատ պապին ասելով, որ իր հայրը ևս մասնակցել է Հայրենական պատերազմին և վիրավորվել: <<Առողջություն եմ մաղթում, ուզում եմ, որ քո առույգությունը փոխանցվի մեր երիտասարդներին: Ես մեծ հարգանք ունեմ բոլոր վետերանների հանդեպ՝ առանձնահատուկ Ձեր հանդեպ: Խնդիր լինի, իմացիր միշտ կողքիդ եմ, Սոկրատ պապ>>-ասաց Հ. Բալասյանը: Հայրենիքին մատուցած ծառայությունների համար Սոկրատ Գրիգորյանը արժանացել է բազմաթիվ մեդալների և շքանշանների:

07.05.16.