Մեկ ամիս և ավել տևեց Բյուրեղավանի 27 և 28 շենքերում կազմակերպված ճամբարը: Բակային ճամբարի կազմակերպչական աշխատանքներն իրենց վրա էին վերցրել նույն շենքերի բնակիչներ Լիլիթ Սոխիկյանը և Աննա Սաֆարյանը: Ընթացքն անցավ հետաքրքիր ու բովանդակալից: Հիմնականում սպորտային խաղեր, սպորտլանդիաներ: Կիրակի տեղի ունեցավ ճամբարի փակման արարողությունը: Բակի երեխաները հրավիրել էին քաղաքապետ Հակոբ Բալասյանին, ով մինչև ուշ երեկո մասնակցեց միջոցառմանը. «Ողջունում եմ բոլորիդ: Որախ եմ, որ մեր քաղաքում կա այսպիսի բակ, որտեղ կարողանում են ամառային արձակուրդները հետաքրքիր ու բովանդակալից դարձնել: Լավ կլիներ, որ համայնքի բոլոր բակերում այսպիսի միջոցառումներ կազմակերպվեն, որպեսզի երեխաների արձակուրդը անցնի ավելի հագեցած: Պատրաստ եմ իմ հնարավորության սահմաններում օգնել նախաձեռնողներին: Շնորհավորում եմ և հաջողություններ մաղթում մեր երեխաներին»- նշեց իր խոսքում քաղաքապետը: Բակային ճամբարի փակման արարողության սկիզբն ազդարարվեց ՀՀ հիմնով, որը շվիով կատարեց Հովհաննես Սոխիկյանը, այնուհետև երեխաները երգեցին, արտասանեցին ու պարեցին: Ուրախ տրամադրությունը համակել էր նաև մեծահասակներին: Նրանք ևս միացել էին երեխաներին: Ճամբարի խորհրդանիշ խարույկը բակում վառվեց ուշ երեկոյան: Մասնակից ակտիվ երեխաները ընթացքում խրախուսվել էին, իսկ միջոցառման կազմակերպիչ աղջիկները քաղաքապետի կողմից կարժանանան հատուկ նվերի:

24.08.16.