Բուժքույր Էմմա Հայրապետյանն իր էությամբ ու կոչումով տիպիկ գթության քույր է: 42 տարի սիրով ու նվիրումով ծառայել է հասարակությանը՝ մասնավորապես մանուկներին: Այսօր բուժքույր Էմմա Հայրապետյանին Բյուրեղավանի պոլիկլինիկայի կոլեկտիվը ճանապարհեց վաստակած հանգստի: Բուժքույրը ոչ միայն բժշկի օգնականն է, այլև դա առանձին մասնագիտություն է: Բուժքույրը կոչված է իրականացնելու մարդկային մեծ առաքելություն: Այս միտումով իր կյանքի աշխատանքային ավելի քան քառասուն տարիները նա նվիրել է սիրելի գործին: Պոլիկլինիկայի տնօրեն Միքայել Միքայելյանն ու իր կոլեկտիվը նրան նվիրված արարողության ընթացքում խոսեցին նրա մարդ տեսակի ու աշխատանքային երկարամյա գործունեության մասին: «1976թ-ից մինչ օրս տիկին Էմման մեր պոլիկլինիկայում աշխատում է բուժքույր: Տարիների ընթացքում նա ձեռք է բերել մեծ հարգանք: Բոլորն են նրան սիրում, շատերին է իր մասնագիտական հմտությունները փոխանցել: Իր գործին վերաբերել է մեծ պատասխանատվությամբ: Ինչ արած, կյանքը շարունակական է, տարիներն անցնում են, և գալիս է ժամանակը, որ պետք է տեղը զիջել երիտասարդներին: Էմմա ջան, մենք շատ շնորհակալ ենք Ձեզ և բարձր ենք գնահատում Ձեր վաստակը» - նշեց Միքայել Միքայելյանը: Բյուրեղավան համայնքի ղեկավար Հակոբ Բալասյանը բարձր գնահատելով Էմմա Հայրապետյանի նվիրումը աշխատանքին, Բյուրեղավան քաղաքում մանուկների առաջնային բուժօգնության և բուժսպասարկման ոլորտում ներդրած մեծ վաստակի, երկարամյա և բարեխիղճ աշխատանքի համար, նրան արժանացրեց շնորհակալագրի և դրամական պարգևի: Կոլեկտիվի անդամները սիրով էին խոսում նրա մասին, կոլեկտիվում նրան կատակով ասում են «Քայլող կոմպյուտր», քանի-որ գրեթե բոլոր մանուկներին ճանաչում է անուն առ անուն, անգամ հիշում է նրանց ծննդյան օրերն ու տարեթվերը:«42 տարի միասին ենք աշխատում»- ասում է ընտանեկան բուժքույր Վարդիթեր Մարտիրոսյանը: «Լուրջ, կազմակերպված, կամեցող ու մարդասեր կին է Էմման: Նա լավ գիտի իր գործը: Մինչև այսօր աշխատել է առանց տրտնջալու` իր սերը տալով մանուկներին»:Էմմա Հայրապետյանը հուզված հրաժեշտ է տալիս իր կոլեկտիվին ու սպիտակ խալաթին, ինչը տարիներ շարունակ պատվով է կրել. «Շնորհակալ եմ բոլորին, նրանց ում հետ աշխատել եմ երկար տարիներ: Հատուկ շնորհակալություն եմ ուզում հայտնել համայնքի ղեկավար Հակոբ Բալասյանին` նման վերաբերմունքի արժանացնելու համար: Դժվար կլինի ինձ համար, որովհետև էլ չեմ զբաղվելու սիրելի աշխատանքով: Բուժքրոջ մասնագիտությունը շատ բարդ է, և ամեն մեկը չէ, որ կարող է դառնալ բուժքույր: Իսկական բուժքույրը նախ և առաջ պետք է լինի մարդասեր»: Մաղթենք տիկին Էմմային առողջություն և երկար տարիների կյանք:

12.02.18